Tamil (Sri Lanka)English (United Kingdom)
ඔබ මෙතනයි:  මුල් පිටුව Rural Economic Development

ග්‍රාමීය ආර්ථික සංවර්ධනය

ග්‍රාමීය ආර්ථික සංවර්ධනය

හැඳින්වීම.

ග්‍රාමීය ජනතාව ආර්ථිකව නගා සිටුවීම සඳහා ග්‍රාමීය කුඩා කර්මාන්ත සංවර්ධනය කිරීම,ග්‍රාමීය යටිතල පහසුකම් සංවර්ධනය කිරීම හා ග්‍රාමීය ජීවනෝපාය සංවර්ධන ව්‍යාපෘති ක්‍රියාත්මක කිරීම සඳහා අවශ්‍ය සහය ලබාදීම මූලික කර ගනිමින් වැඩ සටහන් සංවිධානය කිරීම ග්‍රාමීය ආර්ථික සංවර්ධන අංශය මගින් සිදු කෙරේ. මෙම අංශය මගින් ක්‍රියාත්මක කරනු ලබන සංවර්ධන ව්‍යාපෘති කිහිපයකි.

  1. කිතුල් සංවර්ධන ව්‍යාපෘතිය
  2. මැටි ගම්මාන සංවර්ධන ව්‍යාපෘතිය
  3. සාම්ප්‍රදායික හස්ත කර්මාන්ත ගම්මාන සංවර්ධනය කිරීම හා වැඩි දියුණු කිරීම
  4. ග්‍රාමීය ආර්ථික ප්‍රවර්ධන වැඩසටහන

කිතුල් සංවර්ධන ව්‍යපෘතිය

දිවයිනේ කිතුල් කර්මාන්තය ව්‍යාප්ත වී ඇති ප්‍රාදේශීය ලේකම් කොට්ඨාශ හඳුනා ගනිමින් කිතුල් කර්මාන්තය ආශ්‍රිත රැකියාවන්හි නියුතු කිතුල් මල් මදින්නන්,නිෂ්පාදකයන් හා ව්‍යවසායකයන් සංවර්ධනය කිරීම මෙම ව්‍යාපෘතිය මගින් සිදු කෙරේ. ඒ අනුව කිතුල් නිෂ්පාදන වැඩි දියුණු කිරීම සඳහා පුහුණු වැඩසටහන්,තාක්ෂණික පුහුණු වැඩසටහන් පැවැත්වීම, උපකරණ ලබා දීම, නව නිෂ්පාදන හඳුන්වාදීම, වෙළඳපොළ ප්‍රවර්ධනය සඳහා අවශ්‍ය සහය මෙම ව්‍යාපෘතිය මගින් සිදු කෙරේ.

2018 වර්ෂයේ කිතුල් කර්මාන්තය සංවර්ධනය කිරීම සඳහා රු.මි 15ක ප්‍රතිපාදන වෙන් කර ඇති අතර හඳුනාගනු ලබන ප්‍රාදේශීය ලේකම් කොට්ඨාශවල කිතුල් ආශ්‍රිත කර්මාන්ත සංවර්ධනය කිරීම සඳහා ව්‍යාපෘතියෝජනා ලබා ගැනීමට කටයුතු කරමින් පවතී. මේ සඳහා වන යෝජනා ප්‍රාදේශීය මගින් අමාත්‍යාංශය වෙත යොමු කරන ලෙස ප්‍රාදේශීය ලේකම්වරුන් දැනුවත් කර ඇත.

 

 

 

සාම්ප්‍රදායික හස්ත කර්මාන්ත සංවර්ධන ව්‍යාපෘතිය

දිවයින පුරා විසිර පවතින සාම්ප්‍රදායික හස්ත කර්මාන්ත සංවර්ධනය කිරීම මෙම ව්‍යාපෘතිය මගින් සිදු කෙරේ. ඒ අනුව සාම්ප්‍රදායික හස්ත කර්මාන්තකරුවන් සඳහා තාක්ෂණික දැනුම ලබා දීම, වෙළඳපොළ අරමුණු කරගත් නිර්මාණාත්මක මෝස්තර හඳුන්වා දීම, වෙළඳපොළ අවස්ථා සම්පාදනය කිරීම, නිෂ්පාදන විවිධාංගීකරණය, නවීන උපකරණ ලබා දීමට කටයුතු කෙරේ.

මෙම ව්‍යාපෘතිය යටතේ වෙස්මුහුණු කර්මාන්තය, පබළු ආශ්‍රිත නිර්මාණ, දැවමය අත්කම් භාණ්ඩ නිෂ්පාදනය, පොල්කටු ආශ්‍රිත නිෂ්පාදන, බතික් කර්මාන්තය, කම්මල් කර්මාන්තය, පොල්කටු ආශ්‍රිත නිෂ්පාදන, උණ ලී ආශ්‍රිත නිර්මාණ, හන කර්මාන්තය, තවාසි බුරුසු නිෂ්පාදනය, පැදුරු ගම්මාන සංවර්ධනය, ස්වර්ණාභරණ නිෂ්පාදනය, බීරළු රේන්ද කර්මාන්තය, වර්ණ කඩදාසි ආශ්‍රිත විසිතුරු නිෂ්පාදන වැඩි දියුණු කිරිම සඳහා අවශ්‍ය සහය ලබා දේ.

 

 

මැටි නිෂ්පාදන ගම්මාන සංවර්ධනය

දිවයින පුරා විසිරී පවතින මැටි කර්මාන්තකරුවන් ආර්ථිකමය වශයෙන් ශක්තිමත් කිරීම, වෙළඳපොළ අරමුණු කර ගත් නිෂ්පාදන හඳුන්වා දීම, අඩු ආදායම්ලාභී කර්මාන්තකරුවන් සඳහා උපකරණ ලබා දීම, වෙළඳපොළ අවස්ථා වැඩි දියුණු කිරීම සඳහා මෙම ව්‍යාපෘතිය ක්‍රියාත්මක වේ.

මෙම ව්‍යාපාතිය මගින්

v  සාම්ප්‍රදායික මැටි වළං කර්මාන්තයේ නියැලි කර්මාන්ත කරුවන් සඳහා පුහුණුව ලබා දීම,

v  නවීන තාක්ෂණය ලබා දීම සඳහා පුහුණු වැඩ සටහන් පැවැත්වීම,

v   මැටි භාණ්ඩ නිෂ්පාදනය සඳහා මැටි අඹරණ යන්ත්‍ර ලබාදීම හා විදුලි සකපෝරු ලබාදීම මගින් ගමට තාක්ෂණය ලබා දීම

v  මැටියෙන් තනන ලද ගෑස් වළං නිෂ්පාදනය කිරීම සඳහා අවශ්‍ය යන්ත්‍ර,උපකරණ හා අච්චු ලබා දීම

v  මැටි වළං ආශ්‍රිත කර්මාන්තකරුවන් සඳහා වෙළඳපොළ සහය ලබා දීම සඳහා අලෙවි මධ්‍යස්ථාන හඳුන්වා දීම

v  මැටි කර්මාන්තකරුවන් අලෙවි ප්‍රදර්ශන වෙත යොමු කිරීම තුළින් ඔවුන් දිරිගැන්වීම සඳහා කටයුතු සිදු කරනු ලැබේ.

 

 

 

ග්‍රාමීය ආර්ථික ප්‍රවර්ධන වැඩසටහන - 2018

දිළිඳුකම තුරන්කිරීම අරමුණු කරගත් වැඩසටහන් කෙරෙහි සුවිශේෂී අවධානය යොමු කරමින් ග්‍රාමීය ජනතාව නගාසිටුවීම මෙන්ම නාගරික හා අර්ධ නාගරික කලාපවල අඩු අදායම්ලාභී ජනතාවගේ ආදායම් මට්ටම ඉහළ නැංවීම සඳහා ඵලදායී ක්‍රියාමාර්ග ගැනීම මෙම වැඩසටහන තුළින් බලාපොරොත්තු වේ.මේ යටතේ ග්‍රාමීය යටිතල පහසුකම් සංවර්ධනය කිරීම හා ජීවනෝපය සංවර්ධන වැඩසටහන් ක්‍රියාත්මක කරනු ලැබේ.

ඒ අනුව යටිතල පහසුකම් සංවර්ධනය යටතේ ග්‍රාමීය ප්‍රවේශ මාර්ග සංවර්ධනය කිරීම, බෝක්කු, කුඩා පාළම්, කාණු පද්ධති ඉදිකිරීම් හා නවීකරණය කිරීම්, පොදු පානීය ජල සම්පාදනය,පානීය ළිං අළුත්වැඩියා කිරීම, බහු කාර්ය ගොඩනැගිලි හා වෙනත් පොදු ගොඩනැගිලි අළුත්වැඩියා කිරීම වැනි සංවර්ධන ක්‍රියාකාරකම් මෙමගින් සිදුකරනු ලබයි.

එසේම ජීවනෝපාය සංවර්ධනය කිරීම සඳහා අවශ්‍ය දැනුම, උපකරණ හා පහසුකම් ලබාදීම, ග්‍රාමීය ව්‍යවසායකත්වය‍ සංවර්ධනය කිරීම සඳහා අවශ්‍ය දැනුම, උපකරණ, තාක්ෂණය හා පහසුකම් ලබාදීම ග්‍රාමීය සංවර්ධන ඉලක්ක ලගා කරගැනීමෙහිලා අත්‍යාවශ්‍ය සාධක බැවින් ඒ සඳහා මෙම ව්‍යාපෘතිය මගින් අවශ්‍ය සහාය ලබාදේ.

අවසන් යාවත්කාලීන කිරීම 2018 පෙබරවාරි 07 වෙනි බදාදා, 04:02  
කතුහිමිකම © 2018 ග්‍රාමීය ආර්ථිකය පිළිබඳ අමාත්‍යාංශය. සියළු හිමිකම් ඇවිරිනි.
නිර්මාණය හා සංවර්ධනය : Pooranee Inspirations (Pvt) Ltd.
Last Update 19-09-2018.